Волкот што падна од Марс во Козле
Десет дена откако волк беше заловен во скопската населба Козле, МВР нема никакви информации од каде дошол тој на улицата Јуриј Гагарин и кој го чувал дивото животно, дали е приведен и дали против него е поднесена кривична пријава, бидејќи крши два закона.
ПЕТС.мк побара официјална информација од МВР што презела скопската полиција во врска со овој случај и ги достави следните прашања:
1. Кое одделение или сектор ја води истрагата за да се утврди кој го чувал волкот, со оглед на фактот дека со закон е забрането чување на диви животни?
2. Дали е откриен сторителот, има ли осомничени, од која локација дошол волкот?
3. Дали МВР има прецизна информација за рутата по која се движел и која е таа?
Од МВР не дадоа конкретен одговор на ниту едно од поставените прашања и повторија што се случи на 13 мај кога волкот беше заловен.
„Ве известуваме дека по добиената пријава од страна на полициски службеници е излезено на местото на настанот и во координација со надлежни служби од Град Скопје и стручни лица од ЗОО Скопје, животното на безбеден начин е преземено од нивна страна. СВР Скопје презема соодветни мерки и активности за целосно расчистување на овој настан“, стои во официјалниот одговор на МВР.
Останува непознато дали некој во скопската полиција ги прегледал камерите поставени на сообраќајниците, системот „сејф сити“ и дали се побарани снимки од видео надзор на објектите во близина.
Волкот е диво животно и негово чување е забрането со Законот за заштита на природата во член 32 и со Кривичниот законик.
Неухранет, млад, недоволно развиен и врзан на ланец речиси цело време. Ова се резултатите од првичната анализа на експертите од скопската Зоолошка градина и Агенцијата за храна и ветеринарство (АХВ). Според експертите волкот нема развиени природни инстинкти за да може да биде пуштен во дивина.
