Шарпланинец ќе му го „чува грбот“ на претседателот на УЕФА

Претседателот на УЕФА, Александар Чеферин, кој денес беше во официјална посета на Македонија го доби најубавиот поклон што може да се замисли, чистокрвен македонски шарпланинец.

Чеферин не ја криеше радоста, кога разгледувајќи ги терените од балконот на „Куќата на фудбалот“, се појави машкото кутре подарок од Фудбалската федерација на Македонија (ФФМ). Веднаш го погали по главата а потоа продолжи да го гали додека малиот шарпланинец го гледаше и го запознаваше својот иден сопственик.

Од ФФМ велат дека кутрето засега нема име, тоа ќе биде одлука на Чеферин. Шарпланинецот останува во Скопје уште две недели за да се завршат сите медицински процедури и вакцинација и потоа ќе биде испратен во Словенија каде што Чеферин нестрпливо го очекува.