Се трасира патот за отворање гробишта за домашни миленици
Се трасира патот за решавање на деценискиот проблем со непостоењето на гробишта за домашни миленици. Од Агенцијата за храна и ветеринарство (АХВ) соопштија дека добиле „зелено светло“ од Mинистерството за локална самоуправа, ЗЕЛС и Град Скопје.
АХВ треба да ги подготви законските измени а општините треба да предложат локации за изградба на гробишта. Ова е договорено на состанокот на директорот на АХВ Оливер Миланов, министерот за локална самоуправа Златко Перински и претседателот на Заедницата на единиците на локална самоуправа (ЗЕЛС) и градоначалник на Град Скопје, Орце Ѓорѓиевски.
„Министерството за локална самоуправа, Град Скопје и ЗЕЛС ѝ даваат целосна поддршка на Агенцијата за храна и ветеринарство за решавање на проблемот и потребата од изградба на гробишта за домашни миленици во општините“, информираше директорот на АХВ Оливер Миланов.
Од АХВ информираат дека градоначалникот Ѓорѓиевски на средбата го потенцирал како следен чекор дефинирање на локации во општините за изградба на гробиштата за миленици и планирање на инфраструктурата која треба да се изгради, за тие целосно да можат да се стават во функција на граѓаните.
„Ова ќе претставува решавање на деценискиот проблем и крај на праксата по смртта, труповите на милениците да не се фрлаат заедно со комуналниот отпад или да се закопуваат на јавни површини и други несоодветни локации за таа намена, за што ќе треба да се направи и соодветна измена на одредени законски решенија“, гласи ставот на министерот Перински.
Останува да се види дали идејата ќе има реализација и сопствениците на домашни миленици конечно ќе добијат соодветно место за нивно згрижување по нивната смрт. Гробишта за миленици е честа пракса во светот, а во регионот постојат во Словенија, Србија, Хрватска, Бугарија и Романија.
